Қазақстан Республикасының дамуға ресми көмек ұлттық жүйесі

Қазақстан Республикасы тәуелсіздігін алғаннан бастап Орталық Азия және одан тыс елдерге көмек көрсетіп келеді. Соңғы деректерге сәйкес, жиырма жылдан астам уақыт ішінде Қазақстан дамуға ресми көмек (бұдан әрі – ДРК) іспеттес мақсаттарға 500 млн. АҚШ долл. астам қаражат бөлген.

ДРК-ні жүйелендіру мен оны ҚР сыртқы саясатының басымдықтарымен сәйкестендіру, реципиент-мемлекеттердің әлеуметтік-экономикалық дамуына бағытталған шет елдерге қаржылай, техникалық және басқа да көмек көрсету саласындағы ұлттық экономиканы дамыту, көмек көрсетуді үйлестіру және халықаралық аренада Қазақстан Республикасының рөлі мен беделін нығайту мақсатында 2013 жылғы 9 сәуірде ҚР Президентінің №538 «Қазақстан Республикасының ДРК саласындағы Тұжырымдамасын бекіту туралы» Жарлығы шықты.

Аталған Жарлықты іске асыру шеңберінде 2014 жылғы 10 желтоқсанда «Дамуға ресми көмек туралы» және «Қазақстан Республикасының кейбір заңнамалық актілеріне дамуға ресми көмек мәселелері бойынша өзгерістер мен толықтырулар енгізу туралы» ҚР Заңдары әзірленіп, оларға Елбасы қол қойған. Бұл ретте, Қазақстан аталған заңды әзірлеген және қабылдаған ТМД кеңістігінде баламасы жоқ алғашқы мемлекет болып табылады.

«Дамуға ресми көмек туралы» ҚР Заңының мақсаты Қазақстан Республикасымен ынтымақтастық орнатқан мемлекеттерге ДРК көрсетуге байланысты құқықтық қатынастарды реттеу болып табылады. Заң негізгі түсініктемелерді реттейді, мақсаттарды, міндеттерді және қағидаттарды айқындайды, ДРК-нің салалық басымдықтары белгіленеді, сондай-ақ ДРК үйлестіру мен ұйымдастыруды бекітеді. Заңның орындалуы көрсетілетін дамуды жүйелендіруге және оны Қазақстан Республикасының сыртқы саяси мүдделерімен байланыстыруға мүмкіндік береді.

«ДРК туралы» ҚР Заңын іске асыру үшін Министрлік бірқатар нормативтік құқықтық актілерді әзірлеп, қабылдады. ҚР Сыртқы істер министрінің 2015 жылғы 6 ақпандағы «Мемлекеттік органдар мен ұйымдардың ДРК саласындағы өзара іс-қимыл жасау қағидаларын бекіту туралы» және «ДРК жобалық ұсынысының нысанын бекіту туралы» бұйрықтары.

ДРК туралы Заңға сәйкес, 2017 жылғы 31 қаңтарда ҚР Президентінің № 415 «Қазақстан Республикасының ДРК саласындағы мемлекеттік саясатының 2017-2020 жылдарға арналған негізгі бағыттарын бекіту туралы» (бұдан әрі - МСНБ) Жарлығы қабылданды. Аталған құжат, ең алдымен, географиялық және секторлық басымдықтарды, қаржыландырудың нысандары мен тетіктерін, 2020 жылға дейінгі кезеңге арналған өңірлік және жаһандық жағдайға, әлемдік дамудың күн тәртібіне негізделген ДРК саласындағы ҚР практикалық қызметінің негізгі параметрлері мен құралдарын анықтауға бағытталған.

Қазіргі таңда қазақстандық ДРК жүйесін қалыптастырудың күн тәртібінде 100%-дық мемлекеттің қатысуымен жұмыс атауы «KazAID» халықаралық даму жөніндегі қазақстандық агенттігі» КеАҚ ұлттық операторын құру мәселесі тұр.

Қосылған : 19.05.2018, 11:45, Өзгертілген : 30.10.2019, 18:00